.png)
ايه هو التسجيل؟ 🤔
التسجيل هو اختيار المواد اللي هتدرسها خلال الترم، وبتسجلها من عدد الوحدات المتاح انك تسجلها خلال الترم وحسب المعدل التراكمي (GPA) بتاعك.
امتى بنبدأ نسجل كمستجدين أو كطلاب أقدم؟
⬅️ من بداية الترم التاني في سنة أولى ،أو علي بداية كل فصل دراسي (ترم) ، بنبدأ نسجل موادنا بنفسنا.
هل التسجيل بيكون من المعهد؟
❌ لا، التسجيل بيتم أونلاين من خلال موقع التسجيل الخاص بالمعهد mis.hti.edu.eg.
كم مادة ممكن أسجلها في الترم؟
✔️ لو انت طالب في الترم الأول من سنة أولى، المعهد بينزلك جدول إجباري بـ 5 أو 6 مواد. ✔️ بعد الترم الأول، عدد المواد اللي تقدر تسجلها بيتم تحديده بناءً على GPA:
-
GPA من 3 لـ 4 ➝ تقدر تسجل 18 وحدة (6 مواد).
-
GPA من 2 لـ 2.99 ➝ تقدر تسجل 15 وحدة (5 مواد).
-
أقل من 2 ➝ تقدر تسجل 12 وحدة (4 مواد).
📝 كل مادة عندنا بتساوي 3 وحدات، وأقصى حد للوحدات الي تقدر تسجلها خلال الترم هو 18 وحدة (يونت) ودا طبعاً لو المعدل التراكمي بتاعك (GPA) من 3 لفوق.
هل نفس نظام التسجيل بيتطبق على الترم التالت؟
❌ لا، في الترم التالت تقدر تسجل مادتين فقط (6 وحدات) أو ممكن تسجل تدريب فقط لو مخلص المتطلب السابق بتاع التدريب.
امتى بعرف مواعيد التسجيل؟
📅 قبل بداية كل ترم، المعهد بينزل جدول بمواعيد التسجيل وكذلك مندوبين الدفعات بينزلوها في كل الجروبات.
هل التسجيل بيكون في وقت واحد لكل الطلاب؟
❌ لا، المعهد بيحدد جدول زمني للتسجيل حسب عدد الوحدات اللي محققها الطالب، وكل يوم بيتقسم لفترات وبيكون في فترة مفتوحة.
ازاي أعرف أنا محقق كام يونت؟
📌 بتلاقي عدد الوحدات المحققة في النتيجة على الشمال عند الوحدات المحققة.
هل ممكن أسجل مواد من سنة تانية؟
✅ أيوه، بشرط إن المادة تكون نجحت في المتطلب السابق بتاعها.
هل ممكن أسجل مادة راسب فيها مع مادة جديدة في الترم التالت؟
✅ أيوه، تقدر تسجل مادتين شايلهم، أو مادة شايلها مع مادة جديدة، أو مادتين جداد علي حسب انت عاوز ايه ، وفي حال هتسجل تدريب هيكون مواد رسوب مع تدريب فقط.
ازاي أسجل المواد من على الموقع؟
📺 هنا فيديو شرح التسجيل بكل سهولة:
🔗 شرح التسجيل على الفيسبوك
🔗 شرح التسجيل على جوجل درايف
ودول فيديوهين كمان
الفيديو الأول (طريقة تسجيل مواد الترم الثاني بكل سهولة !)
الفيديو الثاني (حل جميع مشاكل التسجيل المعهد التكنولوجي العالي + ملاحظات هامة اثناء التسجيل)
المشاكل اللي ممكن تظهر أثناء التسجيل؟ 😕
-
"لم يتم تحقيق المتطلب السابق" ❌ ➝ ده معناه إنك لازم تكون درست مادة معينة قبل تسجيل المادة الجديدة.
-
"تم اكتمال عدد المجموعة" 🚫 ➝ الجروب قفل، لازم تدور على نفس المادة في مجموعة تانية.
ازاي أدخل على موقع التسجيل؟
🖥️ ادخل على موقع التسجيل mis.hti.edu.eg ➝ سجل دخول بـ ID والباسورد ➝ اختار "تسجيل مقررات"
لو عدتني فترة التسجيل أعمل ايه؟
⏳ هيكون في فترة تسجيل مفتوحة لكل الطلاب، لكنها أقل مرونة، فالأفضل تسجل في معادك المحدد.
ازاي أعرف المواد والجروبات الي هسجلها؟
📌 المعهد بينزل جداول الترم قبل التسجيل بأيام، بتلاقي فيها المواد، الدكاترة، الأيام، والفترات.
هل لازم أختار جدول كامل من مجموعة واحدة؟
📌 عندك اختيارين:
-
تاخد جدول كامل من مجموعة واحدة.
-
تختار مواد مختلفة من مجموعات متعددة بشرط عدم وجود تعارض في الفترات.
يعني ايه فترات متعارضة؟
📅 يعني إنك سجلت مادتين في نفس اليوم والتوقيت، وبالتالي مش هتقدر تحضر الاتنين مع بعض.
🔹 نصيحة: راجع جدولك كويس قبل التأكيد! ✅
🚀 بالتوفيق في التسجيل! 💪🔥
نشكركم على زيارتكم لموقعنا. يسرّنا معرفة آرائكم حول تجربتكم، كما نرحب بأي ملاحظات أو اقتراحات من شأنها تحسين خدماتنا. فضلاً لا تترددوا في مشاركتها معنا، فآراؤكم تهمّنا وتسهم في تطوير جودة ما نقدمه لكم.