.png)
ايه هو الاستبيان؟
الاستبيان هو وسيلة تقييم بتستخدمها إدارة المعهد وإدارة الجودة في آخر كل ترم علشان يشوفوا الطلاب استفادوا قد إيه من الدكاترة، ويعرفوا المشاكل اللي قابلتهم. الهدف من الاستبيان ده إنه يطوّر العملية التعليمية ويبعد عن الأخطاء اللي حصلت قبل كده، علشان يضمنوا تجربة تعليمية أحسن في المستقبل.
ليه لازم اعمل الاستبيان؟
لما تعمل الاستبيان، ده بيضمن إن صوتك يوصل لإدارة المعهد والجودة، وده بيساعدهم يحلوا المشاكل اللي بتقابل الطلبة في المواد. كمان بيشارك في تحسين جودة التعليم والخدمات اللي بيقدّمها المعهد.
ايه الي بيحصل لو معملتش الاستبيان؟
ده ممكن يخلي في تأخير في فترة التسجيل، ولما ييجي الطالب يسجل، يلاقي المواد اللي عايزها اتقفلت أو مواعيدها مش مناسبة، وده بيضطره إنه يسجل مواد تانية هو مش حاببها أو ممكن تأثر على ترتيبه والايام في الجدول أو حتى على خطته الدراسية خلال الترم ، كمان ساعات التأخير ده بيأثر على الطلاب اللي عايزين يتخرجوا، لأنهم ممكن ما يلاقوش المواد المطلوبة للتخرج، وده يسبب لهم تأخير في التخرج نفسه.
ايه الي بنحتاجه عشان نعمل الإستبيان؟
نفعل الحساب الأكاديمي
زور موقع المعهد علشان تجيب كلمة المرور المؤقتة من مايكروسوفت (هتلاقي إعلان بعنوان "تفعيل البريد الإلكتروني لطلاب الجدد" ومكتوب فيه رقم دفعتك).
بعد كده ادخل على الموقع: mail.office365.com
وسجّل دخولك باستخدام المعرف بتاعك متبوع بـ @hti.edu.eg
اكتب كلمة المرور المؤقتة اللي جبتها، وكمل خطوات التفعيل اللي هتطلب منك تدخل رقم تليفونك، علشان تقدر تنشئ كلمة مرور جديدة — احفظها كويس علشان هتستخدمها بعد كده.
ولو محتاج شرح خطوة بخطوة، تقدر تتابع الشرح في الفيديو التعليمي ده:
استعادة الإيميل الأكاديمي للدفعات القديمة
لو إنت من دفعة قديمة ومش لاقي لينك تفعيل أو استرجاع الإيميل الأكاديمي، فروح على طول على مبنى النظم في المعهد (الي قريب من مبني G)، وكل اللي محتاجه معاك هو كارنيهك وبس.
الناس هناك هيساعدوك ترجع الإيميل بتاعك أو يدوك كلمة سر جديدة، وكمان لو عندك أي مشكلة في الدخول أو التفعيل، هيظبطوهالك في ساعتها.
إزاي نعمل الاستبيان
- هتلاقي إعلان فيه كذا لينك للاستبيانات، بس اللي يهمك تركز عليه هما تلات روابط أساسيين:
- استبيان المواد الدراسية (لو إنت في قسم إدارة الأعمال)
- استبيان التدريب الصيفي (لو كنت مسجل التدريب الترم دا)
- استبيان خدمات إدارة المعهد
- دول اللي لازم تملاهم علشان تعمل الاستبيان، ويتحسب إنك شاركت ومتتأخرش في معاد تسجيلك.
خطوات عمل الاستبيان
- اضغط على رابط استبيان المواد الدراسية.
- اختار المواد اللي انت مسجلها (وخلي بالك تتأكد إن كود المادة صح).
- بعد كده، عبّر عن رأيك في كل مادة وفي الدكتور اللي كان بيدرّسك، ولو عندك أي اقتراحات حطها في المكان المخصص.
- اضغط على "إرسال"، وبعدها دوس على "إرسال رد آخر" وكرر نفس الخطوات مع باقي المواد اللي انت مسجلها.
- ولما تخلص كل المواد، روح على استبيان خدمات إدارة المعهد، وشارك برأيك في الخدمات العامة اللي في المعهد.
- وفي الآخر، اضغط على "إرسال" علشان تكون خلصت العملية كلها.
فيديو تعليمي حول عمل الاستبيان
ممكن تتابع الفيديو اللي بيشرح الخطوات بالتفصيل علشان تكون أكتر وضوح. لو حصل أي تغيير في طريقة الاستبيان، هيتم تحديث الفيديو عشان يواكب التعديلات الجديدة.
نشكركم على زيارتكم لموقعنا. يسرّنا معرفة آرائكم حول تجربتكم، كما نرحب بأي ملاحظات أو اقتراحات من شأنها تحسين خدماتنا. فضلاً لا تترددوا في مشاركتها معنا، فآراؤكم تهمّنا وتسهم في تطوير جودة ما نقدمه لكم.